UGSHPD: Lajmet sheqerka, ‘lollipop’-i mediave të qeverisë me rastin e Ditës Ndërkombëtare të Turizmit

Në faqen e internetit ATSH-ja përforcon pozitat e saj si zëdhënësja kryesore e propagandës së  partisë  në  pushtet. Tema e turizmit vazhdon të  jetë  e vetmja fushë e suksesit që  kërkon të shuajë  sado pak zjarret nga kriza dhe korrupsioni që ka përfshirë  Shqipërinë dhe tymi prej saj synon të mbulojë realitetin e vendit.

UGSHPD (Unioni i Gazetarëve Shqiptarë Profesionistë të Diasporës), gjen me vend sot që në Ditën Ndërkombëtare të Turizmit t’i drejtohet opinionit publik dhe institucioneve shtetërore si INSTAT që të japin edhe një shifër apo statistikë se sa ishte numuri i shqiptarëve që shkuan këtë sezon me pushime. Sa ditë shpenzuan për pushimet dhe sa ishin në gjendje ti përballonin çmimet brenda dhe jashtë vendit?

Të postosh në rrjetet sociale nga Riad- Arabia Saudite  se: “këtë vit kjo ditë e gjen Shqipërinë në vitin e artë të saj, me sezonin që ende vazhdon, por s’do të thotë aspak që e kemi “kry”, përkundrazi na nxit çdo ditë të rimendojmë dhe rikonceptojmë zgjidhje që përdorin asetet e turizmit në paqe të plotë me natyrën, tokën, biodiversitetin”, sic bën Ministrja e Turizmit dhe e Mjedisit, Zj. Kumbaro, kjo duket se është zbatimi i asaj platforme “suksesi” qe drejtoi pak kohë më parë në asamblenë socialiste, kreministri E.Rama.

Edhe në këtë lajm burimi i së cilës është ATSH-ja, INSTAT-i është në gjendje që të japë me përpiktmëri “hyrjet e shtetasve të huaj për 8 muajt e parë të këtij viti arritën në gati 7.2 milionë persona (7,190,410), me një rritje prej 26.9 % në krahasim me të njëjtën periudhë të një viti më parë”.As edhe një shifër e vetme krahasuese me pushuesin apo turistin shqiptar.

Media ka nevojë të jetë e pa anshme dhe objektive për të informuar drejtë publikun, rast të cilin as pushteti dhe as media pro qeveritare kurrë nuk mundet dhe ndoshta me vetëdije dhe me imponim nuk e bën.

I lutemi INSTAT-it le të na japë një shifër të rrumbullakosur  që të mos e lerë ATSH të shpërndajë  lajme “lollipop”,  apo sheqerka për ta kuptuar realitetin, atë që pushuesit dhe turistët shqiptar në këtë sezon i kishin kuletat bosh.

Sa për reklamën propagandistike “Shqipëria në vitin e artë me sezonin që vazhdon…”, tashmë opinioni është i bindur se kjo është mbështjellësja e artë e lajmit qeveritar.